Pas reagimit të opozitës dhe shkrimeve në media, Ministria e Brendshme ka përgënjeshtruar atë që ka deklaruar numri 2 i këtij dikasteri, Julian Hodaj se Shqipëria mund të presë deri në 600 mijë refugjatë siriane e irakene.
Në një deklaratë për mediat, dërguar nga zyra e shtypit e ministrit të Brendshëm Fatmir Xhafaj thuhet se “Hodaj ka folur për një rast hipotetik, se Shqipëria ka përballuar emergjenca siç ka qenë rasti i Koosvës”.
Më poshtë deklarata e plotë:
Nisur nga jehona mediatike e një kronike televizive të rrjetit gjerman ZDF, në datë 19.06.2018, me qëllim evitimin e spekulimeve dhe keqpërdorimeve të përmbajtjes së kësaj kronike, Ministria e Brendshme sqaron se:
– Ndërtimi i kampeve për imigrantë nuk është një çështje në shqyrtim apo në diskutim. Askush nuk e ka kërkuar deri më sot dhe askush nuk e ka ofruar një gjë të tillë.
– Thëniet e zv.ministrit Julian Hodaj, të cituara në kronikë janë përgjigjja e një pyetje konkrete:
“Çfarë mund të bënte Shqipëria në kushtet e një emergjence imigrantësh?”
Përgjigjja e kësaj pyetjeje është ajo që citohet: “Shqipëria e ka treguar gjatë luftës së Kosovës se është në gjendje të përballojë këto emergjenca”.
Pra përgjigjja lidhet me një situatë hipotetike humanitare emergjence, si ajo gjatë luftës së Kosovës ku pati një angazhim shtetëror e popullor, dhe jo mbi një diskutim nëse një kamp mund të ndërtohet ose jo në Shqipëri.
