Nga foltorja e Kuvendit, Ministri i Brendshëm Fatmir Xhafaj u shpreh i vendosur për t’i shkuar deri në fund ngjarjeve kriminale në vend, përfshirë vrasjet që kanë tronditur së fundmi qytetin e Shkodrës.
Teksa theksoi se opozita po zgjedh rrugën e gabuar me qëndrimin e saj dhe akuzat në drejtim të qeverisë, ai foli për një ulje të vrasjeve në vend, krahasuar me kohën kur në qeveri ishte Partia Demokratike.
“Sa i përket mandatin të tyre të parë mesatarja ka qenë 12 në vit, 15 në mandatin e dytë. Në mandatin tonë të parë 9 dhe për këtë vit janë 8, nga të cilat janë zbuluar 4 deri më tani”, tha Xhafaj duke iu referuar vetëm vrasjeve në qytetin e Shkodrës.
Xhafaj: Ne jemi të vendosur t’i shkojmë deri në fund këtyre ngjarjeve dhe shpresoj që shumë shpejt do të përgjigjen para ligjit si autorët, ekzekutorët e tyre ashtu edhe nxitësit e këtyre ngjarjeve të rënda. Kjo sa i përket përgjegjësisë sonë shtetërore dhe përgjegjësisë përballë qytetarëve të Shkodrës. Sa i përket opozitës kanë zgjedhur një kauz të gabuar. Parasëgjithash do të duhej të jepnin llogari përpara qytetarëve të Shkodrës për sigurinë dhe rendin në periudhën që ata kanë drejtuar vendin.
Vrasjet me dashje në Shqipëri në mandatin e parë të PD kanë qenë rreth 230 vrasje, me një mesatare 58 vrasje në vit. Në mandatin e dytë në një mesatare prej 72 vrasje në vit. Në mandatin tonë të parë mesatarja e vrasje ka qenë 43 dhe për këtë vit deri në këtë moment që po flasim janë 24.
Kjo është arsyeja që ne jemi përfshirë në një luftë intenisve me grupet kriminale. Kemi bërë një skanim të plotë të tyre, një profil të qartë të tyre, të grupeve kriminale që nuk u krijuan as dje, as pardje por që e kanë zanafillën me vite të tera me aktivitet intensiv. Kemi goditur një pjesë të konsiderueshme të grupeve kriminale. Gjatë muajit shtator- tator në saj të provave që kemi mbledhur dhe punës intesive që kemi bërë jemi të bindur që do të goditen një pjesë e mirë e këtyre grupeve krimianel. Ne do të vijojmë me përgjegjësi luftën pa kompromis ndaj këtyre grupeve krimianale. Operacioni “Forca e Ligjit” është duke vepruar dhe do të vazhdojë të shënojë rezultate konkrete në një luftë pa kompromis me të gjitha grupet kriminale të çfarëdo qofshin dhe kudoqofshin.
Në nisjen e sezonit të vjeshtës së punimeve të Kuvendit mungonte opozita, e cila zhvilloi një mbledhje të jashtëzakonshme të grupeve parlamentare opozitare në Shkodër.
