Ministri i Brendshëm, Fatmir Xhafaj të dielën në mëngjes ka shkuar në komunën Novoselës në Vlorë për të monitoruar situatën e përmbytjeve tek Ura e Mifolit.
Xhafaj po zhvillon takime me banorët e zonës dhe autoritetet që ndodhen në terren për të ndihmuar qytetarët në përballimin e kësaj situate.
Ministri bëri me dije se në terren janë 2200 forca policore.
Xhafaj: Le të shpresojmë që deri në fund të vazhdojmë kështu që të kemi sa më pak dëme. Është rasti për të falënderuar policinë dhe të themi që kjo është fytyra e vërtetë e policisë. Detyra numër 1 e forcave speciale është që të shpëtojnë jetët njerëzore. Së dyti të shpëtojnë bagëtitë dhe së treti të shpërndajnë ndihma. Faza e parë është shpëtimi i jetëve njerëzore.
Mesazhi i Xhafajt për mediat:
Ka vetëm një mesazh; ne jemi në shërbim të njerëzve. Ndoshta në vlerësimin tim, është ndër përcjelljet më të mira mediatike që i është bërë një situate të tilla. Keni një meritë të veçantë. Zakonisht merrni pjesën e keqe për të bërë lajm, por këtë herë keni marrë edhe pjesët e mira.
