Në seancën e sotme të Kuvendit, ish-ministri i Brendshëm, Fatmir Xhafaj foli për tërmetin e 21 Shtatorit dhe theksoi se qeveria duhet të veprojë për hartimin e një strategjie që të parandalojë dëmet në situata të tilla.
“Tërmetet dhe fatkeqësitë e tjera natyrore nuk mund t’i parashikojmë, por dëmet e mëdha mund t’i parandalojmë. Qeveria do t’i bënte një shërbim të mirë vendit nëse në reflektim të kësaj që përjetuam dhe nevojës për t’u përballur me to, të përgatiste dhe të bënte shumë shpejt publike një strategji të qartë reflektimi të shoqëruar me një plan serioz veprimi. Më së paku, është domosdoshmëri nevoja për evidentimin shkencor të dëmeve, një hartë të re sizmike të vendit, ndërmarrja e një analize shkencore për të përcaktuar zonat problematike që sjellin risqe të mëdha nga tërmtetet, për shkak të ndërtimeve të paligjshme, rezervuarët, digat, urat. E kemi të domosdoshme për të ngritur apo përmirësuar institucionet shkencore të këtyre fushave. Përmirësimin e rregullave të ndërtimit, kontrollin e ndërtimeve, përgjegjësitë ligjore për këtë, mungesën e hapësirës për gjendjen dhe veprimin e emergjencës për situata të tilla dhe miratimin e protokolleve në situata të tilla. Ky tërmet i mirë na paralajmëroi, ne duhet të veprojmë, nesër mund të jetë shumë vonë.” tha Xhafaj.
Pas tij fjalën e mori Ministrja e Shtetit për Marrëdhëniet me Parlamentin Elisa Spiropali. Në lidhje me tërmetet ajo tha se qeveria mori masat e për t’ju ardhur në ndihmë personave të prekur.
“Ishte një tërmet i fuqishëm, më i fuqishmi në 40 vitet e fundit, dhe në këto goditje shkaktohet frikë, dëme, por fatmirësisht nuk pati humbje njerëzore. Shtabi i Emergjencës mori masa, kryesisht për banorët që ishin të pasigurt në banesat e tyre. Në kohë rekord u ngritën grupe në Tiranë e disa qytete të tjera, duke marrë masa”, tha Spiropali.
Ajo shtoi se situata të tilla bëjnë evidente varfërinë, e cila sipas saj vjen si pasojë e një prapambetjeje të trashëguar dhe që është detyrë e qeverisë që ta luftojë.
“Është detyra jonë të bëjmë diferencën e madhe për të çrrënjosur varfërinë, që në raste të tilla si tërmeti, del me gjithë forcën e saj tronditëse. Ne kemi një prapambetje të trashëguar, që duhet luftuar me themel. Përveç solidaritet në tërmet, ne duhet të kthejmë sytë nga varfëria ekstreme për ta luftuar atë deri në qelizë”, deklaroi ministrja. /Opinion.al
