Ditën e sotme Ministrja për Evropën dhe Punët e Jashtme, Olta Xhaçka ka zhvilluar sot një takim me Sekretaren e Përgjithshme të OSBE, Helga Schmid.
Gjatë një konference për shtyp, të mbajtur pas takimit ministrja Xhaçka theksoi se OSBE mbetet një partner i besueshëm për Shqipërinë i cili jep një kontribut të rëndësishëm në vend.
“OSBE ka një histori të gjatë në Shqipëri, që fillon në vitin e mbrapshtë 1997, por ajo mbetet ende sot, edhe pse Shqipëria është një realitet krejt tjetër nga ai i 97, një partner i besuar dhe i rëndësishëm për Shqipërinë që jep një kontribut të rëndësishëm në një sërë kauzash e reformash në vendin tonë”, tha ministrja.
Ajo u shpreh se Shqipëria bashkohet plotësisht me qëndrimin e vendosur të OSBE-së në lidhje me agresionin rus në Ukrainë duke pohuar se kjo ka qenë një nga temat kryesore të bisedës.
“Ndamë pikëpamjen e përbashkët se sot më shumë se kurrë, OSBE nevojitet në Ukrainë”, tha Xhaçka./Opinion.al
