Ministrja për Evropën dhe Punët e Jashtme, Olta Xhaçka në cilësinë edhe të koordinatores për operacionin humanitar në ndihmë të shtetasve afganë ka inspektuar qendrën pritëse të ngritur posaçërisht për pritjen e një numri ende të pacaktuar të emigrantësh afganë.
Xhaçka është takuar me drejtues të disa strukturave të Forcave të Armatosura, të Policisë së Shtetit e të Policisë Kufitare dhe ka ndjekur nga afër punën e bërë në qendrën pritëse në aeroportin e Rinasit, ku qytetarëve afganë do t’u jepet ndihma e parë shëndetësore, asistencë psikologjike/sociale dhe shërbimi bazik për ushqim apo nevoja të tjera të mundshme.
Qendra, e pajisur me çadra mjekësore e të ndihmës së parë ka një kapacitet prej 400 personash dhe do të shërbejë si ndalesa e parë e emigrantëve që do të mbërritjen në Shqipëri.
Më pas, pas modaliteteve respektive ligjore ata do të shoqërohen për në strukturat akomoduese në Tiranë apo Durrës, në varësi të numrit të personave që do të strehohen përkohësisht në Shqipëri.
Qytetarët afganë do të qëndrojnë për pak javë në këto qendra, për t’u zhvendosur më pas në disa struktura hoteljere në bregdet në pritje të kryerjes së procedurave për transferimin e tyre drejt destinacionin final, SHBA./Opinion.al
