Avokatët e themeluesit të Wikileaks, Julian Assange janë shprehur se ai nuk ka patur kohën që i nevojitet për të diskutuar me ekipin e tij ligjor, lidhur me luftën kundër esktradimit në Shtetet e Bashkuara.
Diçka e tillë sipas tyre ka shkaktuar vonesa në trajtimin e rastit të tij. Assange ka shpenzuar shtatë vjet në ambasadën e Ekuadorit në Londër, para se të nxirrej prej aty nga policia vitin e kaluar.
Shtetet e Bashkuara kërkojnë ekstradimin e tij për t’u përballur me 18 akuza duke përfshirë komplotin lidhur me hakimin e kompjuterave qeveritarë dhe shkelje të ligjit për spiunim.
Aktualisht Assage është duke u mbajtur në një burg britanik, në pritje të përfundimit të procedurave për ekstradimin e tij në SHBA.
Ai thotë se akuzat amerikane kundër tij janë tentative politike për të heshtur gazetarët dhe se pretendimet suedeze janë pjesë e komplotit ndaj tij.
Assange mori mjaft vëmendje në vitin 2010 kur Wikileaks publikoi disa video të klasifikuara të ushtrisë amerikane, duke treguar sulmet me helikopterë në Bagdad, që kanë lënë të vdekur dhjetëra persona.
