InstaBIZ

Weinstein shpallet fajtor për sulme seksuale


               Publikuar në : 18:15 - 24/02/20 |
el ida

Ish-producenti i filmave Harvey Weinstein është shpallur fajtor për dy akuza në gjyqin ndaj tij për sulme seksuale.

Ai është dënuar për dy akuzat më të lehta, për përdhunim të shkallës së tretë dhe një akt seksual kriminal të shkallës së parë. Por 67-vjeçari, është liruar nga akuzat më të rënda ndaj tij, ato të sulmit seksual dhe përdhunimit të shkallës së parë. Ai ende përballet me akuza në Los Angeles për përdhunim dhe sulm seksual të dy grave në 2013.

Më shumë se 80 gra, përfshirë aktore të famshme, e kishin akuzuar atë për abuzime seksuale që shtrihen pas në kohë me dekada. Weinstein rrezikonte një dënim me burgim të përjetshëm nëse do të ishte dënuar për përdhunim të shkallës së parë, por ai ende përballet me deri në 25 vjet burg.

Skandali i bujshëm lindi në tetor të vitit 2017 kur “New York Times” publikoi një histori që detajonte dekada akuza për ngacmime seksuale në drejtim të Harvey Weinstein.

Aktoret Rose McGowan dhe Ashley Judd ishin mes të parave që dolën hapur kundër tij. Ato e akuzonin se ai i detyronte ato ta “masazhonin” , ta shihnin lakuriq, të kryenin akte seksuale në zyrë, ndërsa në këmbim u premtonte karrierë, pushtet ose para. Nga ana e tij, producenti bëri një “mea culpa” duke pranuar se kishte shkaktuar shumë dhimbje, por mohoi akuzat.

Furia kundër Weinsteinit çoi në krijimin e asaj që u quajt lëvizja “#MeToo”, që pa qindra gra të akuzonin meshkuj të profilit të lartë në biznes, qeveri dhe mjedise të tjera për abuzime seksuale dhe ngacmime.

Gjyqi ka marrë një vëmendje të lartë publike pasi Weinstein është një prej producentëve më të famshëm të Hollywoodit. Ai ka punuar me një sërë filmash që kanë fituar çmime prestigjioze, përfshirë këtu “Shakespeare in Love”, “The King’s Speech” dhe “The Artist”. Filmat e prodhuar prej tij kanë siguruar më shumë se 81 çmime “Oscar” që prej vitit 1999, dhe ai cilësohej si “Zoti” i tyre./Opinion.al

Pas