Këtë javë, një vend tjetër sinjalizoi se shpresonte të hapte një ambasadë në Jerusalem, dhe çuditërisht, është një komb me shumicë muslimane.
Por ka një gjë të papritur e të pabesuseshme: Izraeli nuk e njeh të pavarur këtë komb.
Presidenti i Kosovës, Hashim Thaçi, tha të enjten se ishte vendi i tij i cili do të hapte një ambasadë në Izrael nëse këta të fundit do të njihnin Kosovën si shtet të pavarur.
“Nëse Kosova do të njihej nga Izraeli, unë do ta hapja Ambasadën e Kosovës në Jerusalem”, ka thënë Thaçi për median Vizion Plus në Shqipëri.
Thaçi, një ish-udhëheqës paraushtarak, ka qenë president i Kosovës që nga viti 2016. Para kësaj, ai ka qenë kryeministër, duke deklaruar në mënyrë të njëanshme pavarësinë e vendit nga Serbia në vitin 2008.
Vendi i vogël ballkanik ishte në qendër të tensionit ndërmjet shqiptarëve etnikë dhe serbëve në vitet 1990 pas rënies së Jugosllavisë, duke kulmuar në Luftën e Kosovës në vitet 1998 dhe 1999, ku shqiptarët e Kosovës u mbështetën nga aleatët e NATO-s.
Kombi, i cili ka një popullsi prej më pak se 2 milion banor, njihet nga shumica e shteteve anëtare të Kombeve të Bashkuara. Megjithatë, Serbia nuk e njeh atë si një shtet të pavarur dhe shumë vende të tjera që kanë frikën e tyre për lëvizjet separatiste kanë refuzuar ta njohin atë, duke përfshirë fuqitë e mëdha si Kina, Rusia dhe India.
Vendimi i Izraelit për të mos njohur Kosovën ishte pjesërisht i bazuar në frikën e vet se palestinezët do ta përdorin Kosovën për të justifikuar pavarësinë e tyre, njoftoi Jerusalem Post në atë kohë.
Megjithatë, politikanët në të dy vendet kanë folur ngrohtësisht për lidhjet e tyre dhe për një marrëdhënie të re në të ardhmen.
