Në prag të zgjedhjeve për Parlamentin Europian, çështja e zgjerimit është zhdukur nga agjendat e politikbërësve europianë. Sipas një shkrimi të Washington Post, kjo është shenjë e një krize që ka të bëjë me ‘paaftësinë e Brukselit dhe cinizmin e shteteve anëtare’. Është pjesë e një historie premtimesh të thyera cila flet për ‘triumfin e mungesës së vullnetit’
Shkrimi me autor Jasmin Mujanovic titullohet “Si po e tradhton Bashkimi Europian Ballkanin Perëndimor”. Politologu i specializuar në rajonin e Europës juglindore vë në dukje dallimet mes atyre gjërave që ju janë thënë vendeve të Ballkanit dhe veprimeve konkrete që janë ndërmarrë në agjendat evropiane.
“Gjatë 16 viteve të fundit, Brukseli i ka premtuar vendeve të Ballkanit Perëndimor, rajoni më i nxehtë i kontinentit, se e ardhmja e Ballkanit është në BE. Megjithatë Brukseli ka bërë një kthesë të dukshme përsa i përket idesë së zgjerimeve të ardhshme” shkruhet në artikull.
Autori sqaron se asnjë nga këto vende nuk i ka përmbushur standardet për anëtarësim në BE por Brukseli e ka përdorur gjithmonë perspektivën evropiane si një mjet për të avancuar implementimin e reformave të cilat ndihmojnë në arritjen e standardeve. Kjo perspektivë ka shërbyer gjithashtu edhe si një mjet gjeopolitik për të mbajtur larg rajonit influencat ruse, turke apo kineze.
Fatkeqësisht për të dyja palët, argumenton Mujanovic, kjo kthesë në agjendat europiane nuk mund të vinte në një moment më të keq. Nga njëra anë skepticizmi ndaj zgjerimit ka ndihmuar të moderuarit në vendet e BE të ndalojnë një rrjedhje pushteti tek radikalët, ndërsa nga ana tjetër vendet e Ballkanit Perëndimor kanë arritur ne një pikë ku vetëm perspektiva evropiane mund ti ulë gjakrat. Rasti më i fundit që autori përdor si shembull është ai i Maqedonisë së Veriut. Qeverisë dhe qytetarëve atje ju premtua se nëse dakortësohen me Athinën për të ndryshuar emrin, negociatat me ta do të hapen. Po çfarë vlere do të ketë hapja e negociatave kur Presidenti Macron duket se e ka përjashtuar pa afat mundësinë e zgjerimit të BE?
Megjithatë situata ka ende një zgjidhje dhe studiuesi paraqet një këshillë për vendet anëtare të Bashikimit Europian.
“BE-ja është në kohë për ndryshuar kurs. Ato duhet të hapin formalisht negociatat me Shqipërinë dhe Maqedoninë e Veriut dhe të paktën ti japin Bosnjes statusin e vendit kandidat. Kjo do ta stabilizojë për momentin situatën. Megjithatë detyra kryesore është krijimi i një plani afatgjatë për rajonin i cili nuk do të synojë një zotim të besueshëm ndaj normave të demokracisë liberale por edhe një kundërpërgjigje të fortë kundër Rusisë dhe të ngjajshëmve të saj”
Ky është apeli që kërkon të përçojë shkrimi i Washington Post, “Duke i thënë thjesht jo Ballkanit Perëndimor mund të jetë një taktikë e mirë kundër segmenteve radikale në Europë por nuk është në fakt një strategji. Është thjeshtë një shtyrje krize”. /Opinion.al
