Presidenti serb, Aleksandar Vuçiç, ka dhënë një intervistë së fundmi në CNN, ku ka folur lidhur me ngjarjet e ndodhura në Veri të Kosovës.
Gjatë intervistës ai është pyetur nga gazetarja nëse Serbia e njeh Kosovën si shtet të pavarur e sovran, por Vuçiç i ndodhur në vështirësi përpiqet të ndërojë temë.
Gazetarja i rikujton presidentit serb se është fakt që Serbia nuk njeh pavarësinë e Kosovës, prandaj e pyet çfarë do të bëjë Serbia?
Vuçiç: Nuk e dëgjova pyetjen tuaj të fundit, më vjen keq!
Gazetarja: Pyetja ime është se a e njihni Kosovën shtet të pavarur dhe sovran?
Vuçiç: Ne njohim kartën e OKB-së dhe Rezolutën e OKB-së, por ne jemi gjithmonë gati të diskutojmë të gjitha zgjidhjet e kompromisit dhe gjithmonë kemi qenë gati për këtë dhe gjithmonë do të jemi. Ju përmendet le të themi presidentin Putin dhe mund t’ju them se kam dëgjuar edhe median tuaj dhe mediat e tjera se Serbia, nën direktivat e Rusisë do të sulmojë këtë apo atë shtet apo etnitet. Kjo sigurisht nuk ka ndodhur.
Por gazetarja e ndërpret presidentin serb dhe i thotë se nuk e pyeti për Rusinë dhe Putin.
“Askush nuk e përmendi as Rusinë e as Putinin në lidhje me tensionet.” I gjetur në siklet, Vuçiç shprehet se pyetjen e kishte kuptuar gabim.
Vuçiç ndër të tjera u shpreh se detyrimet e Serbisë që rrjedhin nga marrëveshjet e nënshkruara janë përmbushur 100% në përputhje me Rezolutën 12/44 e OKB-së.
I pyetur se si mund të bëhet çtensionimi i situatës, Vuçiç u shpreh se serbët do të vijojnë protestat paqësore dhe do të bëjnë gjithçka për ta stabilizuar situatën e cila sipas tij është destabilizuar nga regjimi i Prishtinës.
