“Të gjitha njësitë e policisë serbe janë në gatishmëri të plotë. Ne do të jemi plotësisht të përgatitur për të mbrojtur paqen. Nëse do të vijë një sulm i mëtejshëm ndaj popullit serb, Serbia do të reagojë. I kam paralajmëruar te gjithë për këtë. Qëllimi është që të trembë popullin tonë në veri të Kosovës, dhe njerëzit tanë janë më të shqetësuar se kurrë. Për herë të parë ndjeva ankth serioz dhe unë jam i shqetësuar se veprime të tilla mund të vazhdojnë”.
Kjo deklaratë e presidentit serb, Aleksandar Vuçiç ka tensionuar dhe më shumë situatën mes Prishtinës dhe Beogradit, pas operacionit që përfundoi me arrestimin e disa zyrtareve serbe, boshnjakë dhe shqiptarë në veri të Mitrovicës.
Një përgjigje ka marrë dhe nga Presidenti i Kosovës Hashim Thaçi.
“Është deklaratë populiste që kryesisht ka parasysh opinionin e brendshëm në Serbi. Aleksandar Vuçiç e di shumë mirë që nuk mund të lëviz në drejtim të Kosovës diçka që është e pamundur dhe e paimagjinueshme dhe vet ai është i bindur por në çdo rast institucionet e Republikës së Kosovës duke përfshirë edhe FSK janë në gjendje gatishmërie”.
Policia e Kosovës nisi një operacion në veri të Mitrovicës, i cili, deri më tani, ka rezultuar me ndalimin e disa zyrtarëve policorë dhe të disa qytetarëve.
Aksioni policor, sipas njoftimeve zyrtare, ka si qëllim luftimin e krimit dhe kontrabandës. Si rezultat, janë arrestuar disa persona të dyshuar, ndërkohë që një polic është plagosur nga të shtënat me armë zjarri dhe tre të tjerë kanë marrë plagë të tjera të lehta./ Opinion.al
