“Po talleni me mua, apo çfarë? Nuk mund ta ekstradoj Milan Radoiçiçin në Prishtinë, sepse ne nuk e njohim Kosovën”. Kështu është shprehur presidenti i Serbisë, Aleksandër Vuçiç, në një intervistë për Sky News, pas deklaratave të kryeministrit Kosovar Albin Kurti që kërkoi ekstardimin e tij.
I pyetur për përfshirjen e Beogradit në sulmin terrorist në Banjskë të Zveçanit, dhe për akuzat e Kosovës se Beogradi i ka planifikuar ngjarjet në Banjskë dhe i ka ofruar armë grupit terrorist, si dhe për fotografitë e publikuara nga Policia e Kosovës, të cilat tregojnë se shumica e armëve të konfiskuara janë prodhuar në Serbi, presidenti i Serbisë thotë se është gjithmonë më e lehtë të akuzosh Beogradin.
“Kush do të besojë se në fakt është ndryshe? Pothuajse askush”, tha Vuçiçi në këtë intervistë.
Duke folur për Milan Radoiçiçin, i cili ka pranuar të ketë qenë lider i grupit terrorist, Vuçiçi ka dhënë detaje të reja se si i ka siguruar armët, duke iu referuar deklaratës së Radoiçiçit.
“Personi që u mor në pyetje në procedurën paraprake tha se ka blerë diçka në Serbi, diçka në Kroaci, diçka në Bosnjë-Hercegovinë. Le ta verifikojmë tani”, tha Vuçiçi për Sky news, duke iu referuar Radoiçiçit.
I pyetur nëse Radoiçiç ka qenë aleati i tij i ngushtë, Vuçiçi është përgjigjur pozitivisht: “Nuk ka dyshim, ai ka qenë nënkryetar i Listës Serbe”.
Megjithatë, ai nuk mund të thotë se ishte shoku i tij. “Ai u akuzua. Ishte një shkelje e madhe, shumë e madhe penale”, theksoi Vuçiç.
I pyetur se pse nuk e ekstradon Radoiçiçin në Prishtinë, Vuçiç përgjigjet me pyetjen: “Po talleni me mua, apo çfarë?”.
“Po ju pyes sepse e dini se ne nuk mund të ekstradojmë askënd në Prishtinë, sepse nuk e njohim Kosovën si shtet”, tha Vuçiç.
Ai theksoi se agresioni që iu bë shtetit të Kosovës “është një krim i rëndë”.
I pyetur nëse ka simpati për këta njerëz, Vuçiçi thotë se nuk ka dhe se e dënon vrasjen e një polici. Megjithatë, ai shton se ndryshe nga Kosova, e cila e ka cilësuar sulmin si terrorist dhe rrjedhimisht edhe pjesëtarët e grupit si terroristë, ai nuk mund t’i përshkruajë kështu “njerëzit që kanë jetuar atje dhe kanë dashur të kthehen”.
I pyetur se pse nuk i normalizon marrëdhëniet me Kosovën, Vuçiçi tha se “Serbia po bën gjithçka dhe është konstruktive dhe se kështu ka qenë edhe në takimin e fundit në Bruksel, duke pranuar të gjitha propozimet” e Borrellit e Lajçakut.
“Pala tjetër nuk ka dashur të bëjë asgjë lidhur me Asociacionin e Komunave me shumicë serbe, i cili është nënshkruar para 10 vitesh dhe nuk kanë dashur të lëvizin në atë drejtim. Ata gjithmonë kërkonin vetëm njohje dhe asgjë tjetër”, tha Vuçiçi.
Ai shtoi se nuk do të kishte policë shqiptarë në veri të Kosovës nëse do të respektohej Marrëveshja e Brukselit.
“Duhet të kishte serbë me uniformën e Policisë së Kosovës, sipas nenit 9 të Marrëveshjes së Brukselit”, tha Vuçiçi për Sky News.
Presidenti serb fajësoi sërish kryeministrin Albin Kurti për situatën në veri. “Por e di se askush nuk do të dëgjojë këtë”, thotë ai.
