Presidenti i Serbisë, Aleksandar Vuçiç, tha se për “problemin e Kosovës” duhet zgjidhje e përhershme, e cila duhet të arrihet në atë mënyrë që asnjëra palë të mos fitojë gjithçka, por mjaftueshëm.
Vuçiç iu drejtua të enjten Asamblesë së Përgjithshme të Kombeve të Bashkuara në New York.
“Kemi filluar të luftojmë për një zgjidhje të përhershme dhe presim që bota t’i kuptojë qëndrimet dhe argumentet tona dhe të mos e mbështesë palën e kundërt, siç ka bërë nga viti 1999 deri më 2008”, -tha Vuçiç.
Ai tha se arritja e marrëveshjes me Kosovën, për normalizimin e marrëdhënieve është e rëndësishme për stabilitetin në rajonin e Ballkanit.
Vuçiç u shpreh se Serbia ka biseduar me Kosovën, me ndërmjetësimin e Bashkimit Evropian, lidhur me “tensioneve dhe incidenteve të shpeshta në Kosovë dhe veprimeve të njëanshme të Prishtinës”.
Vuçiç tha se taksa që u ka vënë Kosova prodhimeve të Serbisë, gjatë në nëntor të vitit të kalaur ka bërë që Serbia të humbë 350 milionë euro.
“Tarifa që vazhdon të jetë në fuqi, ka vënë në rrezik edhe jetën normale dhe të dinjitetshme të serbëve në Kosovë”, -tha Vuçiç.
“Në gjithë këtë kohë, Serbia ka reaguar në mënyrë të moderuar dhe me përgjegjësi ndaj veprimeve të njëanshme të Prishtinës, duke mos vendosur kundërmasa dhe duke bërë përpjekje të qetësojë situatën”,-tha Vuçiç.
Autoritetet e Kosovës, me gjithë thirrjet të Bashkimit Evropian dhe të Shteteve të Bashkuara për heqjen e taksës, nuk kanë ndryshuar qëndrim.
Kryeministri I dorëhequr, Ramush Haradinaj, i cili e ka marrë vendimin për taksën, e ka kushtëzuar heqjen e saj me njohjen e shtetit të Kosovës nga Serbia. Vuçiç, në disa raste, ka përsëritur se nuk mund të ketë dialog pa heqjen e taksës.
