Presidenti serb Aleksandar Vuçiç mbërriti në Tiranë rreth orës 21:00, për të marrë pjesë në samitin e Brdo Brijunit. Ai është takuar me shefen e politikës së jashtme në BE, Federica Mogherini.
Ndërkohë sipas Tanjug, presidenti serb Aleksandër Vuçiç ka shkuar në Tiranë duke u përballur me atmosferë tensionesh.
“Aleksandër Vuçiç arriti në Tiranë mes një atmosfere tensionesh të nxitur nga deklaratat e Presidentit të Kosovës, Hashim Thaçi se bashkë me Kryeministrin e Shqipërisë Edi Rama, që kanë diskutuar rreth nismës rajonale për bashkimin e faktorit shqiptar, hapjen e plotë të kufirit mes Shqipërisë dhe Kosovës bashkë me Luginën e Preshevës”,thekson Tanjug.
Ndërkohë, Lëvizja Vetëvendosje protestoi pasditen e kësaj të mërkure në Tiranë kundër ardhjes së presidentit të Serbisë Aleksandër Vuçiç dhe kreut të serbëve të Bosnjës, Millorad Dodik.
Protestuesit mbanin pankarta ku shkruhej se Vuçiç e Dodik duhet të shpallen persona non grata.
Por situata u tensionua për shkak se qytetarët tentuan të hyjnë në Bulevard dhe të marshojnë drejt sheshit Nënë Tereza. Sipas uniformave blu protestuesit nuk ishin pajisur me lejen përkatëse.
Pas një përpjekjeje për të vijuar tubimin, protestuesit u ndaluan me forcë nga policia. Lëvizja Vetëvendosje më pas konfirmoi përmes një postimi në Facebook se 2 anëtarë të saj janë arrestuar./ Opinion.al
