Presidenti i Serbisë, Aleksandër Vuçiç deklaroi se do të bisedojë me Putinin për çështje kyçe si Kosova, çështjet rajonale por edhe situata politike në Evropë dhe në botë, si dhe bashkëpunimi dypalësh pas nënshkrimit të marrëveshjes midis Serbisë dhe Bashkimit Ekonomik Euro-Azi.
Kreu i shteti serb tha se sa i përket atij, çështja e spiunazhit me Rusinë është çështje e mbyllur pas bisedës me ambasadorin rus në Beograd, Aleksandr Bocan Harchenko.
“Ndërgjegjja jonë është e pastër dhe jam i bindur se ne do të vazhdojmë të zhvillojmë marrëdhëniet më të mira. Nëse rusët kanë ndonjë gjë për të na fajësuar, unë do të doja ta dëgjoja atë”, tha Vuçiç në Soçi të Rusisë, ku edhe do të takohet me presidentin rus, Vladimir Putin.
Më 21 nëntor presidenti Vuçiç, pas mbledhjes së Këshillit të Sigurisë Kombëtare kishte konfirmuar se Serbia në disa raste ka konstatuar dhe dokumentuar përmes fotografive, video-incizimeve dhe regjistrimeve audio, kontaktet e nënkolonelit, Georgy Kleban, pjesëtar i Shërbimit të Inteligjencës Ushtarake ruse (GRU) dhe anëtarëve të Ushtrisë së Serbisë./Opinion.al
