Presidenti i Serbisë, Aleksandër Vuçiç, i dha të hënën Ana Bërnabiçit mandatin për formimin e qeverisë së re të Serbisë.
Vuçiç tha se ka pasur disa kandidatë, por Bërnabiç, e cila ka qenë kryeministre e Serbisë nga viti 2017, “ka punuar në interes të qytetarëve, ka qenë besnike ndaj Serbisë dhe ka punuar për përfitimet e vendit”.
Për Bërnabiçin “ka një mendim shumë të lartë”, tha Vuçiç.
Ai tha se i ka kërkuar asaj që të konsiderojë hapjen e dy ministrive të reja, për të drejtat e njeriut dhe barazinë gjinore, si dhe për kujdesin ndaj familjes dhe fëmijëve.
“Po ashtu e kam lutur që, nëse është e mundur, 50 për qind ose afër 50 për qind e anëtarëve të qeverisë të jenë gra”, tha Vuçiç.
Ana Bërnabiç ka qenë kryeministre e Serbisë nga 29 qershori, 2017.
Zgjedhjet parlamentare në Serbi u mbajtën më 21 qershor. Opozita kryesore i bojkotoi ato ndërsa lista e Aleksandër Vuçiçit shpalli fitoren me 60.65% të votave. /Opinion.al
