Rajoni

“Vuçiç kërcënoi Kosovën për luftë”, Osmani: BE dhe NATO t’i përgjigjen


Bëhu pjesë e Grupit Zyrtar të Opinion.al
>> KËTU <<
               Publikuar në : 17:51 - 12/11/20 |
Opi Nion

Presidentja në detyrë e Kosovës, Vjosa Osmani ka reaguar pas deklaratës së të presidentit të Serbisë, Aleksandar Vuçiç, i cili është shprehur se një konflikt si i Nagorno Karabakut mund të ndodhë në Kosovë, nëse përpjekjet për kompromis dështojnë.

Vuçiç  tha se zgjidhja më e mirë e mundshme është përmes dialogut me Kosovën, “në të kundërtën mund të na ndodhë ndonjë konflikt”.

Ndërkohë, Osmani është shprehur se Vuçiç ka kërcënuar hapur Kosovën për luftë dhe se për këtë deklaratë pret reagimin e Bashkimit Evropian dhe NATO-s.

“Unë pres që Bashkimi Evropian dhe NATO-ja t’i përgjigjen këtij kërcënimi për luftë të dhunshme, të bërë nga Vuçiç”, shkroi Osmani në Twitter.

Nagorno Karabaku njihet ndërkombëtarisht si pjesë e Azerbajxhanit, por qeveriset nga armenët etnikë, me mbështetjen e Qeverisë armene.

Luftimet për kontrollin e këtij rajoni kanë shpërthyer qysh më 27 shtator, ndonëse këtë javë është shpallur një marrëveshje për armëpushim.

Një luftë midis Azerbajxhanit dhe Armenisë për këtë rajon ka përfunduar në vitin 1994 me armëpushim, por pa marrëveshje të paqes.

“Konflikti në Nagorno Karabak ka treguar shembullin e një konflikti të ngrirë, por kur dikush e shkrin atë, mund të përshkallëzojë në një katastrofë të vërtetë”, tha të enjten Vuçiç.

Kosova dhe Serbia janë në bisedime për normalizimin e marrëdhënieve qysh në vitin 2011. Negociatat ndërmjetësohen nga Bashkimi Evropian dhe mbështeten nga Shtetet e Bashkuara./ Opinion.al

Pas