Presidenti serb Aleksandar Vuçiç njoftoi se ushtria dhe policia gjetën eksplozivë të vendosur pranë një tubacioni që transporton gaz në Serbi dhe Hungari.
Ai tha se “dy pako të mëdha me eksplozivë me detonatorë” u gjetën brenda çantave të shpinës në Kanjiza të Serbisë veriore, “disa qindra metra larg tubacionit të gazit”.
Bëhet e ditur se gazsjellësi Balkan Stream është një zgjatim i gazsjellësit TurkStream dhe transferon gazin rus si në Serbi ashtu edhe në Hungari.
Vuçiç tha se e kishte informuar kryeministrin hungarez Viktor Orban “për rezultatet fillestare të hetimit nga autoritetet ushtarake dhe policore mbi kërcënimin ndaj infrastrukturës kritike të gazit”.
Orban konfirmoi se të dy udhëheqësit kishin folur dhe tha se kishte thirrur një “këshill të jashtëzakonshëm mbrojtjeje” në Hungari për të dielën pasdite.
Nuk u dhanë detaje se kush mund t’i ketë vendosur eksplozivët pranë tubacionit të gazit dhe pse.
Në vend të kësaj, Vuçiç tha se kishte “gjurmë të caktuara” për të cilat nuk ishte i gatshëm të jepte hollësi.
