Presidenti serb, Aleksandër Vuçiç në një takim me përfaqësuesit e Konventës Kombëtare për Bashkimin Evropian, është shprehur se është pro kompromisit me shqiptarët.
Teksa është diskutuar hapja e një tjetër dialogu me Kosovën, Vuçiç tha se është kundër konfliktit të “ngrirë”.
“Unë jam kundër ruajtjes së konfliktit të ngrirë dhe ne po përpiqemi të bëjmë një kompromis me shqiptarët”.
Më tej, ai vuri theksin te paqja dhe stabiliteti në rajon duke bërë një pasqyrim të asaj çka po ndodh mes Armenisë dhe Azerbajzhanit.
“Rasti i Armenisë dhe Azerbajxhanit na ka treguar se sa të rrezikshme janë të ashtuquajturat konflikte të ngrira. Sepse një ditë, gjithçka që është e ngrirë do të shkrihet nga dikush”, -tha Vuçiç.
Sipas tij, reagimi i bashkësisë ndërkombëtare ndaj ripërtëritjes së konfliktit në Nago-Karabak ishte i vakët dhe se kjo mund të shërbente si një mësim për Serbinë.
“Kjo na tregon shumë mirë që kohërat në botë kanë ndryshuar, se ka interesa të veçantë më të fortë në krahasim me interesa me të vogla grupore të cilat kanë ekzistuar më herët dhe se ne e dimë shumë mirë se duhet të jemi të gatshëm për të ruajtur vendin tonë në çdo kohë,” -tha Vuçiç.
Tema e këtij takimi ishte “Politika e Jashtme e Serbisë” dhe “Perspektivat e dialogut midis Prishtinës dhe Beogradit dhe rifillimi i dialogut për zgjidhjen e çështjes së Kosovës”.
Sipas Vuçiç, kjo politikë ka dy qëllime: e para është pozicionimi i vendit dhe ruajtja e stabilitetit politik dhe paqes në rajon, dhe e dyta është përparimi ekonomik i vendit.
Në anën tjetër, ambasadori i Shteteve të Bashkuara të Amerikës në Kosovë, Philip Kosnett ka deklaruar se është e pamundur të arrihet te një marrëveshje pa “kompromise” nga të gjitha palët./Opinion.al
