Presidenti serb Aleksandër Vuçiç nuk do të marrë pjesë në samitin BE-Ballkani Perëndimor që do të zhvillohet më 6 dhjetor në Tiranë. Lajmi bëhet me dije nga media serbe ‘Blic’.
Sipas ‘Blic’ ky vendim i Vuçiç vjen për shkak emërimit të Nenad Rashiç si ministër për Komunitete dhe Kthim në Qeverinë e Kosovës.
Vuçiç ka akuzuar Kosovën se ka shkelur marrëveshjen e Brukselit, ndërsa ‘Blic’ shkruan se nuk do të marrë pjesë në samit sepse sipas Presidencës serbe, BE nuk ka regauar ashpër pas emërimit të Nenad Rashiç si ministër.
Më 23 nëntor Kosova dhe Serbia arritën një marrëveshje lidhur me përdorimin e targave të makinave që çoi në uljen e tensioneve në veriun e Kosovës por jo edhe kthimin e punonjësve serb në institucione.
Kryeministri Albin Kurti tha të mërkurën se largimi i serbëve nga institucionet ishte vendim politik dhe se kthimi i tyre duhet të bëhet në rrugë ligjore.
