Policia e Fierit ka sekuestruar 1 milion euro pasuri të paluajtshme. Mësohet se pasuria e sekuestruar i përket Vangjel Ziaj, 50-vjeç nga Fieri.
Sipas policisë, pasuria është përfituar nga veprimtari kriminale.
Është sekuestruar një apartament 70 metra katrorë në lagjen “Kryengritja” të Fierit, si edhe një kompleks shërbimesh në lagjen “Sheq i Madh”. Gjithashtu është sekuestruar edhe një automjet tip “Benz”.
Ziaj është i dënuar në Itali me 32 vite e gjysmë burg, me akuzën “Trafikim Narkotikësh”.
Njoftimi i policisë
Fier
“Forca e Ligjit” në veprim, sekuestrohen 1 milion euro pasuri të paluajtshme të përfituara nga veprimtaria kriminale.
Në kuadër të luftës kundër krimit të organizuar dhe pastrimit të parave, gjurmimit, gjetjes, sekuestrimit me qëllim konfiskimi të aseteve kriminale që rrjedhin nga veprimtaria kriminale, është hapur procedimi penal i regjistruar për veprën penale “Pastrimi i produkteve të veprës penale ose veprimtarisë kriminale” parashikuar nga Neni 287 i Kodit Penal për hetime të pasurisë së shtetasit Vangjel Ziaj (Arben Gropa).
Në përfundim të veprimeve të kryera, nga ana e Sektorit për Hetimin e Krimit Ekonomik e Financiar në Drejtorinë Vendore të Policisë Fier në bashkëpunim me Prokurorinë e Rrethit Gjyqësor Fier, u zbatua vendimi i Gjykatës së Rrethit Gjyqësor Fier për sekuestro preventive në lidhje me pasuritë e shtetasit:
– Vangjel Ziaj, 50 vjeç, banues në Fier.
Ky shtetas është dënuar nga autoritetet italiane me 32 vjet e 6 muaj burg për veprën penale “Trafiku i narkotikëve” dhe është duke vuajtur dënimin në Itali.
• Pasuritë e sekuestruara kapin vlerën e 1 milion euro:
• Kompleks shërbimesh “Pelikani” i ndodhur në lagjen “Sheq i Madh” Fier.
• Një apartament me sipërfaqe 70 metra katror në lagjen “Kryengritja e Fierit”.
• Një automjet i markës “Benz”.
Vijon puna për identifikimin e pasurive të tjera që mund të ketë ky shtetas dhe personat e lidhur me të.
