Robert Neçaj, vrojtues plazhi, ka qenë një ndër personat e përzgjedhur nga emisioni Opinion në Tv Klan si një nga 12 personazhet e vitit 2022.
Teksa ka folur për punën e tij, ai ka rrëfyer në studio një moment të vështirë ku ka shpëtuar tre persona nga mbytja. Neçaj ka thënë se ka qenë nëna, i biri dhe një grua tjetër që po rrezikonin të mbyteshin.
E ndërsa thotë se nëna i kërkoi që ta linte atë dhe të shpëtonte të birin, Neçaj tregon se në fund ia doli t’i nxirrte të tre nga deti.
Pjesë nga diskutimi në studio
Robert Neçaj: Ka qenë nëna, i biri duke u mbytur dhe një grua tjetër. I biri ishte futur në det, e kishte marrë deti, kishte hyrë e ëma për ta shpëtuar dhe një familjar tjetër. Mbesin të tre. Nuk ishte plazhi im sepse në plazhin tim kisha aftësinë që ta parandalojë rastin, por deti ishte i rrezikshëm dhe unë dëgjoj ulërima që po mbytej dikush. Shkoj drejt tyre. Më thotë nëna, kape djalin dhe lëshomë mua, vetëm shpëtoma djalin, se s’kishte fëmijë tjetër. Na çoj Zoti, thotë, shpëtimtarin në atë moment.
Blendi Fevziu: I shpëtove të tre?
Robert Neçaj: Të tre në një moment.
