Një shqiptar rreth moshës 30 vjeç është vrarë ditën e dielë në shtetin spanjoll.
I riu u braktis të dielën në dyert e urgjencës së spitalit Josep Trueta në Girona me një plagë me thikë në bark.
Mediat vendase shkruajnë se viktima e cila ishte pa dokumente, është arritur të identifikohet nga targa e makinës me të cilën ka mbërritur në spital.
Sipas autoriteteve spanjolle ngjarja ka ndodhur rreth orës 07:00 të së dielës, kur një automjet ka ndaluar në derën e emergjencës së qendrës. Ndërkohë mjekët dhe infermierët kanë ndihmuar menjëherë për të nxjerrë nga makina shqiptarin, i cili kishte një plagë me thikë në bark dhe ishte në arrest kardiorespirator.
Stafi mjekësor i urgjencës është përpjekur t’i japë ndihmën mjekësore që i nevojitej, por pa sukses. Sipas burimeve nga mediat vendase, kur ka mbërritur në qendrën e urgjencës “shqiptari tashmë kishte vdekur”.
Hetuesit kanë analizuar përmbajtjen e kamerave të vëzhgimit të spitalit së bashku me personelin e sigurisë për të parë targën e mjetit që la viktimën në urgjencë dhe u largua.
Nga hetimet e kryera është verifikuar targa dhe pronari i mjetit, një shtetas me origjinë shqiptare, me banim midis rajonit Maresme dhe La Selva.
Mëngjesin e të hënës, atij iu mor një deklaratë në stacionin e policisë Vista Alegre në Girona. Falë kësaj deklarate, agjentët kanë zbuluar se viktima, ashtu si drejtuesi i mjetit, ishte gjithashtu me origjinë shqiptare dhe rreth 30 vjeç.
Policia spanjolle është duke vazhduar me hetimet, për të zbuluar se kush është vrasësi i 30-vjeçarit. Nga ana tjetër, trupi i pajetë është transferuar në Institutin e Mjekësisë Ligjore në Girona (IMLC) në mënyrë që mjekësia ligjore të kryejë autopsinë dhe të zbardhet në këtë mënyrë shkaku i saktë i vdekjes./Opinion.al
