Një shqiptar ka mbetur i vrarë pas një sherri të ndodhur mes disa personave në Itali. Mediat italiane shkruajnë se dy shqiptarë të tjerë kanë mbetur të plagosur.
Sipas informacioneve ngjarja ka ndodhur në orët e para të pasdites, në via Dorighello, në lagjen Forcellini. Një burrë u gjet i pajetë në tokë brenda një ndërtese banimi pikërisht në kryqëzimin me via Cordenons. Ekipet e shpëtimit dhe karabinierët që kanë ndërhyrë në vendngjarje, kanë raportuar se tre shqiptarët janë konfliktuar me njëri-tjetrin dhe më pas sherri ka degraduar në përdorimin e thikës.
Sipas hetimeve të para të kryera nga karabinierët, duket se tragjedia ka qenë kulmi i një sherri të dhunshëm që ka ndodhur në rrugë mes tre personave, të gjithë me kombësi shqiptare.
Për të zbardhur ngjarjen ka mbërritur edhe prokurori Roberto Piccione, i cili koordinon hetimet në vazhdim. Rrethanat e sakta të episodit tragjik ende nuk janë përcaktuar, por qyteti i Padovës u shënua nga një tjetër ngjarje dramatike e përgjakshme. Vetëm javën e kaluar kishte ndodhur një tjetër tragjedi, e cila kulmoi me plagosjen e rëndë të një karabiniere dhe vdekjen e një shqiptari.
