Një ngjarje e rëndë ka ndodhur mbrëmjen e djeshme në Itali, ku 52-vjeçari Vladimir Topjana u qëllua për vdekje në parkingun midis dy bizneseve tregtare në via Michelangelo Buonarroti, në Fontanafredda, në provincën e Pordenone.
Sipas asaj që shkruajnë mediat, ngjarja ndodhi pranë një lokali ku njerëzit ishin mbledhur për të shikuar ndeshjen e Serie A, Roma-Juventus.
Topjana, një shtetas me origjinë shqiptare, po fliste me një të afërm në parking, ndërkohë që biseda u ndërpre shpejt nga mbërritja e një Audi të madh të bardhë.
Të paktën dy persona, po ashtu me kombësi shqiptare, kanë zbritur nga makina dhe mes të katërve më pas ka nisur një debat i ashpër që ka shkuar deri në ngritje zëri.
Kjo ka tërhequr vëmendjen e disa klientëve, të cilët tentuan të rikthejnë qetësinë, por pa sukses.
Më pas, shqiptarët kanë lëvizur në një hapësirë mes dy bizneseve, ku debati verbal u shndërrua në vrasje. Njëri nga personat nxorri armën dhe qëlloi të paktën tre herë. Një nga plumbat e kapën Topjanën në kokë duke i marrë jetën menjëherë.
Nga hetimet fillestare duket e besueshme që Topjana e dinte se kush e qëlloi. Vrasësi, sipas dëshmitarëve, është nisur menjëherë drejt tij, pa hezituar.
Sa i përket autorit, ai është arrestuar nga policia dhe bëhet fjalë për një 30-vjeçar shqiptar. Ai fillimisht u arratis nga vendi i krimit, por u kap pas disa orësh teksa ishte nisur në drejtim të një qyteti tjetër.
Hetuesit tashmë po kërkojnë prova që do të ndihmojë në investigim. Me shumë mundësi viktima e njihte vrasësin e tij pasi ky i fundit iu drejtua menjëherë sapo zbriti nga makina./Opinion.al
