Është dorëzuar në polici mbrëmjen e kësaj të enjte autori i vrasjes së Altin Balliut, ngjarje e ndodhur më datë 17 janar të këtij viti. I dorëzuari është Olger Mustafaj, 34-vjeç i cili rezulton me precedencë penale të mëparshme.
Më 17 janar, një grup miqsh ishin ulur brenda një lokali, para të cilit gjendej makina e tyre e cila kishte bllokuar rrugën. Autori i vrasjes kërkonte të kalonte, por rruga ishte e zënë. Grupi që ndodhej në lokal bashkë me viktimën, dalin dhe zihen. Autori largohet për t’u rikthyer disa minuta më pas ku edhe qëllon në drejtim të tyre. Plumbat kapën në kokë 30-vjeçarin Altin Balliun duke e lënë të vdekur.
Emri i Olger Mustafaj u lakua nga mediat në vitin 2013, pas një sherri në Burgun e Drenovës ku kryente dënimin për plagosje të rëndë. Mustafaj plagosi gjatë ajrimit të burgosurin tjetër Aurel Nazifi. Shkak i ngjarjes mendohet se ka qenë një konflikt i nisur 6 muaj përpara ngjarjes mes dy të dënuarve, për arsye banale./ B.K Opinion.al
