Gëzim Toma, autor i vrasjes së një 25-vjeçari në Martanesh, është ekstraduar nga Athina. I dënuar me 20 vite burg në Shqipëri, 37-vjeçari tani do të vuajë dënimin. Fillimisht ai u arrestua nga autoritetet shqiptare për vrasjen e Fatos Daxhës, 25 vjeç dhe u çua në Burgun e Drenovës. Pak muaj në këtë burg dhe duke kërcënuar me armë gardianët, në 23 nëntor të 2013 arrin të arratiset. 6 ditë më vonë, 29 nëntor të 2013, është arrestuar në pyllin e fshatit grek Eleptaora, rreth 25 km larg Shqipërisë, pas një pëprlasje me armë me policinë greke ku mbeti i plagosur.
Ngjarja
Toma ka akuzuar fqinjin e tij, Daxha, se i kishte vjedhur drutë e zjarrit që ai kishte sistemuar në oborrin e pallatit. 25-vjeçari Daxha nuk e ka pranuar akuzën dhe i është lutur disa herë fqinjit ta linte rehat në hallin e tij. Megjithëse reagimi i Daxhës ka qenë mjaft i butë, dëshmitarë okularë në vendin e ngjarjes kanë parë momentet e tmerrit. Gëzim Toma ka lënë sheshin para pallatit dhe është ngjitur në shtëpinë e tij, duke dalë prej andej me një thikë të madhe në dorë. Personat që kanë parë ngjarjen nuk kanë guxuar të ndërhyjnë për të ndalur krimin, pasi, sipas tyre, Toma ishte mjaft i xhindosur dhe i është vërsulur komshiut, duke e goditur me thikë disa herë në trup.
Arratisja në 2013
Toma kishte pak kohë që ishte transferuar në Burgun e Drenovës dhe duket se ishte miqësuar me grupin e shkodranëve, me të cilët ka planifikuar arratisjen. Admir Tafili, Fran Marashi, Gëzim Guri, Gëzim Toma, Reis Haxhiraj, Eduard Lulo dhe Artur Gora, nën kërcënimin e armëve çarmatosën gardianët, qëlluan me breshëri kallashnikovi për mosafrimin e rojave dhe më pas ikën nga Burgu i Drenovës. Admir Tafili, Fran Marashi dhe Gëzim Guri u arrestuan pak ditë më pas në një magazinë në periferi të Përrenjasit./ Opinion.al
