Gjykata e Shkodrës ka dhënë sot masën arrest me burg për Stjuart Smakajn autorin e vrasjes së Gledis Krajës dy ditë më parë. Smakaj nuk e ka mbajtur dot veten dhe ka shpërthyer në lot në gjykatë pasi siç është mësuar vrasja ka qenë aksidentale, pasi Gledis Kraja ishte shoku i ngushtë i 29-vjeçarit.
Smakaj ka deklaruar më herët në polici se gjatë një sherri me shtetasin Denis Halili, ai është larguar në drejtim të makinës së dezinfektimit dhe në atë moment i ka lindur dyshimi se mund të marrë ndonjë armë. Ndaj është ngjitur me shpejtësi në katin e dytë në pallatin ku banonte dhe ka marrë armën me idenë për të qëlluar, por nuk e ka ditur se pas makinës ka qenë edhe shoku i tij.
“Kam qëlluar në drejtim të makinës, ku ishte Denisi, por nuk e dija se aty kishte shkuar edhe shoku im dhe e kam vrarë gabimisht”, ka thënë ai.
Ndërsa shtetasi Denis Halili ka deklaruar se kur ka ikur në drejtim të makinës, atë e ka ndjekur nga pas shtetasi Gledis Kraja që të mos futej brenda në mjet. Në atë moment kur të dy ndodheshin te makina kanë dëgjuar krismat e armës.
“Kam ikur me shpejtësi, jam shtrirë dhe më pas kam ikur me vrap për t’iu shpëtuar plumbave. Duke ikur kam parë se Gledis Kraja ishte plagosur dhe ra në tokë”, ka deklaruar Halili.
Konflikti nisi për shkak të parkimit të furgonit që transportonte mobiljet e porositura nga familja Smakaj. Vëllezërit i kanë kërkuar shoferit që ta largonte më tutje kamionin për të mos bllokuar rrugën, por shoferi e ka pasur të vështirë dhe mes tyre ka nisur një debat. Në atë moment shoferi ka thirrur në vendngjarje pronarin e mobilierisë që të sqarohej me klientët, vëllezërit Smakaj.
Në këtë ngjarje ishin përfshirë në njërën anë vëllezërit Smakaj, shoku i ngushtë Gledis, që humbi jetën, babai i tyre dhe disa persona të tjerë, ndërsa në anën tjetër pronari i mobilierisë nga Fushë Kruja, kunati i pronarit dhe shtetasi Denis Halili bashkë me shoferin e kamionit të mobilerisë./ Opinion.al
