Ditën e sotme, Policia e Tiranës njoftoi se forcat “Shqiponja” arrestuan Kastriot Fejzon. 49-vjeçari u kap duke qarkulluar në kryeqytet me automjetin e tij dhe kishte me vete 20 mijë dollarë dhe 2 milionë lekë.
Kastriot Fejzo ishte shpallur në kërkim pasi ai është dënuar nga Gjykata e Rrethit Gjyqësor Kolonjë me 17 vjet e 6 muaj e 24 ditë burgim për veprën penale “Vrasja me dashje, e kryer në bashkëpunim”.
Konkretisht bëhet fjalë për vrasjen e dy komisionerëve zgjedhorë në Ersekë Nako Skupra dhe Ilirjan Arapi në qershor të vitit 1997. Gjatë kësaj ngjarje mbetën të plagosur edhe shtetasit Taqo Skupra, Alfred Shehu, Kastriot Zenollari, Arben Arapi dhe Shaban Koxhaj.
Fejzo është arrestuar njëherë në vitin 2012 në Greqi, ku sipas dëshmive të familjarëve të tij u arratis në vitin 2008. Ata pretendojnë se ai është i pafajshëm në lidhje me ngjarjen e vitit 97’ dhe kanë kërkuar rigjykim. Sipas tyre, Kastriot Fejzo ka ushtruar lirisht biznesin e tij pas vitit 1997 deri në vitin 2008 kur u njoftua se ishte në kërkim. Për këtë ai u arratis në Greqi ku dhe u arrestua 4 vite më vonë. Megjithatë ende nuk dihet se si ai i ka shpëtuar drejtësisë edhe pse ndaj tij kishte një dënim të rëndë për vrasje.
Për ngjarjen e 29 qershorit 1997 në Ersekë akuzohen 7 persona. Nga këta 4 janë arrestuar, kurse tre të tjerë, Hysni Dervishi, Roland Hasani dhe Spartak Sageri, janë ende në kërkim. /Opinion.al
