Vrasësi i gjyqtares Fildez Hafizi, ish-bashkëshorti i saj, Fadil Kasemi do t’i nënshtrohet një ekspertize për aftësinë mendore. Vendimi është marrë nga Prokuroria për Krimet e Rënda me kërkesë të avokatëve. 53 vjeçari po bën çdo përppjekje për ti shpëtuar dënimit maksimal me burgim të përjetshëm për vrasje me paramendim.
“ABC News” ka siguruar një shkresë të firmosur nga kreu i Prokurorisë për Krimet e Rënda, Besim Hajdarmataj, ku bëhet me dije vendimi për verifikimin e gjendjes mendore të të dyshuarit. Në dokument sqarohet se akt-ekspertimi psikiko ligjor të cilit do t’i nënshtrohet Kasemi do të kryhet pranë Institutit të Mjekësisë Ligjore, Tiranë.
Sipas procedurës, përfundimet e këtij akti do të administrohen me tej në dosjen hetimore dhe atë gjyqësore. Në rast se del i papërgjegjshëm mendërisht, Kasemi mund t’i shpëtojë dënimit për krimin.
Në përballjet e deritanishme me gjykatën Kasemi nuk ka shfaqur pendesë për krimin. Në seancën e 20 shtatorit në Apel për masën e sigurisë, ai i kërkoi palëve të mos merreshin me familjen dhe gruan e tij, pasi ai e donte atë akoma.
Prokuroria për Krimet e Rënda akuzon Kasemin për veprën penale të “vrasjes për shkak të marrëdhënieve familjare”, për të cilën parashikohet dënim nga 20 vjet deri në burgim të përjetshëm. Për shkak të ndryshimeve të pësuara në Kodin e Procedurës, ai nuk mund të përfitojë gjykim të shkurtuar.
