Një ngjarje e rëndë ka ndodhur ditën e sotme në lagjen “Dardania” në qytetin e Prizrenit.
Mësohet se një 30-vjeçar ka vrarë me thikë babanë e tij 50-vjeç. Sipas zëdhënësit të Policisë për Rajonin e Prizrenit, Shaban Osmanollaj, personi me iniciale M. H. dyshohet se ka sulmuar prindërit e tij, teksa i vdekur ka mbetur babi.
“Ju informojmë se sot me datë 25 dhjetor 2020, rreth orës 13:55 një qytetar e ka njoftuar stacionin policor Prizren-Veri se në lagjen Dardani, Rruga “Nazim Kokollari” është duke ndodhur një rast dhune në familje ku djali është duke i sulmuar prindërit.
Patrulla policore ka arritur në vendngjarje dhe ka arrestuar personin e dyshuar M. H., rreth 30 vjeç, i cili e ka sulmuar prindin e tij me thikë. Si pasojë e plagëve të marra viktima (prindi) përkatësisht babai, rreth 50 vjeç ka ndërruar jetë. Emergjenca, njësitë policore dhe forenzika kanë dalë në vendin e ngjarjes”, ka thënë Osmanollaj.
Ndërkaq një tjetë punonjës i Policisë së Prizrenit njofton se vrasja ka ndodhur në rrugë.
Haxhi Kabashi pjesë e Policisë së Prizrenit, deklaroi se aktualisht një dëshmitar i cili ka parë ngjarjen ndodhet në polici për të zbardhur detaje rreth vrasjes.
“Ngjarja ka ndodhur në rrugë. Një dëshmitar okular e ka parë ngjarjen. Ai është duke u intervistuar në stacionin policor”, tha Kabashi.
Ndërkohë sipas dëshmitarit, vrasja dyshohet se ka ndodhur pas një sherri momental në familje. /Opinion.al
