Një infermiere britanike u dënua me burgim të përjetshëm pa mundësinë e lirimit me kusht për vrasjen e shtatë foshnjave dhe tentativën për vrasjen e gjashtë të tjerëve në spitalin në Mbretërinë e Bashkuar ku ajo punonte.
Lucy Letby, 33 vjeçe u dënua me burg të përjetshëm nga Gjykata e Kurorës së Mançesterit në Anglinë veriore, që do të thotë se ajo nuk do të lirohet kurrë.
Letby refuzoi të paraqitej në bankën e të akuzuarve, duke nxitur thirrjet për ndryshimin e ligjeve në mënyrë që të pandehurit të marrin pjesë në seancat e tyre të dënimit.
Ajo u shpall fajtore të premten nga një juri, në një çështje që tmerroi vendin dhe e bëri atë vrasësen serial të fëmijëve më të bujshme të kohëve të fundit në Britani.
Gjyqtari Justice Goss dha dënimin e rrallë, që është burgimi i përjetshëm, pa mundësi lirimi, duke i thënë asaj: “Ti do ta kalosh pjesën tjetër të jetës në burg”.
Letby akuzohet se ka përdorur turnet e natës për të kryer sulmet ndaj foshnjave, sepse ajo e dinte se prindërit nuk kishin gjasa të vizitonin repartin e të porsalindurve. 33-vejçarja vrau foshnjat duke i mbytur, gjatë kohës që punonte në spitalin “Countess of Chester”, që përkon me periudhën midis qershorit 2015 dhe qershorit 2016.
Letby u shpall gjithashtu fajtore për vrasje të mbetur në tentativë për 6 foshnja të tjera. Ajo refuzoi të kthehej në gjykatë për të dëgjuar dënimin e saj.
“Ishte një makth i gjallë”, tha nëna e djemve binjakë, njëri prej të cilëve u vra dhe një i mbijetoi helmimit nga insulina.
“Bota jonë u shkatërrua kur hasëm të keqen e maskuar si një infermiere e kujdesshme. Duam drejtësi dhe ajo ditë ka ardhur, tha nëna e një vajze dyditëshe, që u vra nga Letby./Opinion.al
