Policia e greke ka identifikuar personin që vrau sot 50-vjeçarin shqiptar në Selanik.
Sipas mediave greke, vrasësi u identifikua nga targat e makinës me të cilën u arratis. Por policia nuk e ka zbuluar identitetin e tij për mediat.
Megjithatë është bërë e ditur se autori është me origjinë shqiptare. Ai është person me precedent penal dhe i njohur për policinë greke për disa vepra penale.
Krimi i rëndë ndodhi sot rreth orës 13:00 pranë një pike karburanti në Selanik. Viktima dhe autori kanë qenë më herët së bashku në një lokal pranë zonës ku ndodhi krimi.
Mes tyre nisi një sherr, arsyet e të cilit ende nuk janë bërë të ditura.
Pas konfrontimit në lokal, të dy u larguan me makinat e tyre. Më pas u gjendën në të njëjtën pikë karburanti në rrugën Solonos të Selanikut.
50-vjeçari shqiptar ndodhej në karburant për të furnizuar makinën. Ndërsa paralelisht në rrugën kryesore kishte ndaluar makina e autorit, tip Peugeot ngjyrë e zezë.
Kamerat e sigurisë kanë filmuar të gjithë krimin. Viktima shihet te dritarja e makinës së autorit dhe godet me zinxhir personin që ndodhet brenda mjetit.
Por në këtë moment ai qëllohet me armë zjarri dhe bie përtokë. Ndërsa vrasësi është larguar me shpejtësi nga vendi i ngjarjes./Opinion.al
