52-vjeçari shqiptar Petrit Gegës pak ditë më parë vrau me thikë në Calcinatello të Brescia-s të Italisë bashkatdhetarin e tij 33-vjeçarin bashkatdhetarit Alfons Kola. Ai ka habitur autoritetet me deklaratën e dhënë pas arrestimit.
Para autoriteteve ai ka thënë “Dëgjoj zëra, shoh djallin. Dua të flas me një ekzorcist”. Gega u ndalua nga karabinierët rreth 1 orë pas krimit.
Ishin kamerat e shumta të sigurisë në zonë që e identifikuan. Kamerat filmuan po ashtu momentin e sherrit fillimisht me fjalë e më pas goditjen disa herë të 33-vjeçarit me një thikë kuzhine.
Alfons Kola gjeti vdekjen disa orë më vonë në spitalin e Brescia-s ku u transportua me helikopter në gjendje të rëndë. Kola dhe Gega ishin të dy nga fshati Kallmet i Vogël i Lezhës, fqinj me njëri-tjetrin.
Pikërisht njohja e tyre e hershme, bën që hetuesit italianë të mos përjashtojnë mundësinë se krimi mund të ketë ardhur edhe për shkak të mërive të vjetra.
Megjithatë, ende nuk ka një motiv për krimin e rëndë. Petrit Gega nuk ka folur ende për këtë. Ai mësohet se ka kërkuar ekzorcist dhe ka pretenduar se dëgjon zëra.
Kujtojmë se pak ditë më parë, avokatja e 52-vjeçarit tha se “bëhet fjalë për një çështje delikate”, pa dhënë shpjegime të mëtejshme, duke shtuar edhe më shumë misterin rreth kësaj vrasjeje.
