Prokuroria e Durrësit ka vendosur të rihetojë tetë dosje të rëndësishme kriminale.
Prokurori ka kërkuar ndihmën e policisë për të zbardhur vrasjet e tipit mafioz të cilat ende nuk kanë një autor.
Vrasjet mafioze në qytetin bregdetar nuk janë zbardhur për shakat të mungesës së provave, bashkëpunimit të familjarëve të viktimave, dëshmitarëve apo personave të afërt të cilët mund të kenë informacion për motivet e ekzekutimeve.
Duke u nisur nga ky ngërç, Prokurori ka kërkuar rihapjen e dosjeve, me qëllim mbledhjen e informacioneve dhe provave që do të çojnë autorët e vrasjeve pas hekurave.
Ndër vite qyteti i Durrësit është tronditur nga vrasjet e tipit mafioz, por që kanë mbetur pa autor.
Kujtojmë vrasjen e qershorit të vitit 2012-s, ku ekzekutua me breshëri automatiku 35 vjecari Elvis Dedej. Vrasja ndodhi në një zonë mjaftë të frekuentuar nga qytetarët, tek Shkëmbi i Kavajës.
Një vit më vonë dhe pikërisht muajin shtator të 2013-s ndërtuesi 40 vjeçar Plaurent Cani u ekzekutua. Dyshimet për vrasjen e tij ishin për hakmarrje, ose ekzekutim për vrasës me pagesë
Po ashtu,10 ditë nga vrasja e biznesmenit, oficerët e hetimit kriminal u përballën me një tjetër ekzekutim të frikshëm. Nëna e Elvis Dedejt, Fatmira Dedej u gjet e vdekur me plumb në kokë e trup, në garazhin e pallatit ku banonte, në qendër të Durrësit. Në atë kohë policia foli për të njëjtët vrasës që ekzekutuan të birin, por pa mundur t’i identifikojë.
Janari i 2014-s me një tjetër mënyrë ekzekutimi, atë me anë të shpërthimit të telekomanduar. Viktima ishte biznesmeni 45-vjeçar Xhemal Çela.
Pak muaj më vonë, një tjetër biznesmen u ekzekutua pak kilometra nga vendi ku u hodh në erë makina e Celës. Kujtim Dyrmishi, nuk mundi t’i shpëtonte atentatit me automatik sapo kishte zbritur nga automjeti.
Vrasja e Ervin Kodrës dhe Endri Çaushaj, në shtator të 2015 një tjetër krim i rëndë. Por një muaj më vone, në Janar të 2016, merret peng Gazment Çollaku. Jo shumë larg nga vendi ku u ekzekutuan dy të rinjtë, në zonën më të frekuentuar të qytetit, siç është shëtitorja “Taulantja”.
Më pas ekzekutimi i tij në Krujë, nga persona të kamufluar me uniforma policie, ishte një tjetër ngjarje që rriti pasigurinë në qytet. Në maj të 2016, Shpëtim Shala 38 vjeç, u ekzekutua me 15 plumba nga një armë “Scorpions” me silenciator në plazh, sapo u nda nga shokët.
Ndërkohë, bëhet me dije se disa nga viktimat kishin njohje me njëri-tjetrin, ndërsa kishte dyshime se ishin të përfshirë në trafikimin e lëndëve narkotike dhe në vepra të tjera kriminale. Burimi: Abcneës/ Opinion.al E.XH.
