Policia ka dhënë informacion zyrtar lidhur me ngjarjen e rëndë të ndodhur mëngjesin e sotëm, ku dy motra u gjetën të vrara në banesën e tyre në kryeqytet. Viktimat janë Kristina Bardhi dhe Zhaneta Metani.
Sipas uniformave blu ngjarja ka ndodhur gjatë një konflikti të çastit, ku shtetasi P. A., 59 vjeç, ka qëlluar me armë zjarri bashkëjetuesen e tij dhe motrën e saj, ende të paidentifikuara.
“Më datë 31.12.2020, rreth orës 10:30, në Astir, shtetasi P. A., 59 vjeç, dyshohet se gjatë një konflikti të çastit, ka qëlluar me armë zjarri bashkëjetuesen e tij dhe motrën e saj, ende të paidentifikuara, të cilat si pasojë e plagëve të marra kanë ndërruar jetë.
Menjëherë në vendngjarje kanë shkuar forca të shumta policie, të cilat kanë rrethuar zonën, me qëllim kapjen e autorit”.
Ndërkaq policia informon se janë ngritur pika kontrolli në të gjitha akset rrugore dhe vijon puna nga grupi hetimor, nën drejtimin e Prokurorisë, për sqarimin dhe dokumentimin e plotë të rrethanave të ngjarjes.
Ndërkohë është identifikuar dhe automjeti me të cilin autori është larguar nga vendngjarja dhe bëhet fjalë pikërisht për makinën tip Voklsvagen që shihet në këtë foto.
