Noel Disha, personi që vrau mbrëmjen e së hënës në zonën e Astirt, 28-vjeçarin Vilson Tafçiu ka deklaruar se nuk ka dashur ta vrasë.
Pasi u vetëdorëzua dje në polici, Disha ka dhënë dhe dëshminë e tij para efektivëve të policisë ku ka pranuar se e ka qëlluar shokun e tij pasi ky i fundit e kishte “sharë nga nëna”. Ai thotë se ishte ndjerë shumë i ofenduar por gjithashtu shton se është në gjendje shumë të rënduar psikologjike pasi është penduar për krimin e bërë.
“Me Vilsonin ishim shokë prej vitesh. Nuk kam dashur ta vras. Të hënën shkova tek Artisti për ta takuar. Nuk kam paur si qëllim ta vras. Unë lëvizja gjithmonë me armë me vete. Kur e takova ai më shau nga nëna. U ndjeva shumë i ofenduar për shkak të marrëdhënies që kishim pasur. Unë e kam marrë në shtëpi nuk duhet ta thoshte këtë gjë. U nervozova dhe e qëllova. Pas krimit jam larguar dhe kam qëndruar në një hotel ne Kavajë. Jam shumë i penduar për krimin e kryer”, ka thënë i riu në dëshminë e tij.
Megjithatë, 29-vjeçari nuk ka dhënë shkakun se pse miqësia e tij dhe viktimës ishte prishur. Ai kishte thirrur Vilson Tafçiun pikërisht për të sqaruar konfliktin i cili nuk dihet pse ka ndodhur por në të kundërt është përshkallëzuar në bisedë e sipër dhe përfundoi me vrasjen e 28-vjeçarit Tafçiu me një plumb në zemër. /Opinion.al
