Kanë dalë sot në gjykatë për masën e sigurisë, autori i vrasjes së Marvi Mihalit, Eugen Bitraj dhe 3 bashkëpunëtorët në krimin e rëndë. Seanca në gjykatën e Tiranës zhvillohet me dyer të mbyllura dhe jashtë saj qendrojnë familjarët e autorëve. Babai i Eugen Bitrajt, personit që i mori jetën me thikë, Marvi Mihalit ka kërkuar falje dhe i ka shtrirë dorën e pajtimit familjes Mihali.
“Fjalët e para vështirë t’i gjesh, i urojmë ngushëllime familjes Mihali. Jam prind dhe i shpreh keqardhjes familjen, nënës, babait dhe të afërmve. I them familjes Mihali, të gjejmë forca dhe të reagojmë pozitivisht. Ne nuk kemi mundësi të takohemi, se situata është e nxehtë. Duhet të gjejmë një njeri të përbashkët që të marrim masa dhe të na orientojë drejt zgjidhjes. U krijua nga një karikues celulari dhe ndodhi e gjithë kjo”, tha ai para gjykatës.
Djali i vetëm i sportistit Pavllo Mihali dhe mësueses së anglishtes Mira Mihali, Marvi vetëm 22 vjeç u godit me thikë mbrëmjen e së hënës pranë stadiumit Selman Stermasi. Sherri mes Marvi Mihalit dhe Dejvi Bitrajt 19 vjec, kishte lindur për një karikues telefoni. Në ndihmë të Dejvit ka shkuar djali i xhaxhait Eugen Bitraj dhe shokët e tjerë, Kridens dhe Marsel Alla. Në sherr e sipër, Eugen Bitraj ka vrarë Marvi Mihalin. Katër personat janë arrestuar dhe sot gjykata pritet të caktojë masën “arrest me burg” për ta.
/Opinion.al
*Foto nga gjykata, në kafaz 4 autorët
*Foto para gjykatës; vëllezërit Bitraj, baballarët e Eugen dhe Dejvi Bitrajt
