58-vjeçari, Renato Hoxhaj u qëllua nga dy armë zjarri, mëngjesin e 17 prillit në lagjen “Hajro Çakërri” në Vlorë.
Kjo e dhënë është zbuluar nga policia dhe prokuroria e Vlorës, pas ekspertizës së 3 predhave që i morën jetën 58-vjeçarit, nga ku rezultoi se vrasësi ka përdorur dy armë të ndryshme.
Për hetuesit, kjo shton akoma më shumë dyshimet, se vrasësi ka qenë qitës profesionist dhe me pagesë.
Ndonëse lëvizjet e autorit janë ekspozuar në disa pamje kamerash sigurie në zonën ku ndodhi ngjarja, policia ende nuk ka mundur të identifikojë atë.
Grupi hetimor është vënë në kërkim të automjetit që ai ka përdorur si para dhe pas ngjarjes.
Bëhet fjalë për një fuoristradë “Range Rover”, e cila rezulton e blerë në Tiranë në muajin Prill. Ky automjet sipas burimeve i është vënë në dispozicion vrasësit nga Eris Mehmeti, i arrestuar nga policia e Vlorës.
Gjetja e kësaj makine, për hetuesit konsiderohet me tepër rëndësi pasi sipas tyre, përmes saj mund të shkohet në identifikimin e vrasësit të 58-vjeçarit.
Renato Hoxhaj, i cili më herët ka mbajtur emrin Alfred, u qëllua me 3 plumba sapo doli nga banesa e tij mëngjesin e së dielës së shkuar.
Ndonëse ai nuk rezultonte një person me precedent, hetuesit dyshojnë se ekzekutimi i tij mund të ketë ardhur për shkak të lidhjes që ai kishte me një grup kriminal.
Tv Klan
