Gjatë kontrollit në banesën e viktimës së atentatit të djeshëm, Devi Kasmi policia ka gjetur mbi 3 kg kokainë dhe një lloj tjeter droge sintetike me emrin LSD.
Devi Kasmi u vra në atentat mbrëmjen e djeshme në derën e pallatit të tij në rrugën “Kongresi i Manastirit”, pranë QSUT-së. Në kërkim për vrasjen është shpallur Domart Konjari. Një emër i njohur ky për drejtësinë shqiptare.
Dy persona me motor e prisnin Kasmin në hyrje të pallatit dhe mësohet se kanë qëlluar 10 plumba, 4 prej të cilëve e kanë kapur Kasmin në kokë dhe trup.
Në njoftimin e policisë nuk saktësohet nëse Konjari është ekzekutori, por dyshohet se ai është në dijeni dhe i përfshirë në vrasjen mafioze, si një nga dy personat e atentatit.
Policia thotë se gjatë hetimeve paraprake për zbardhjen e ngjarjes, në banesën e viktimës ka gjetur dhe sekuestruar 3 kilogramë kokainë, 300 gramë drogë LSD dhe një armë automatike.
Grupi hetimor i kësaj çështjeje ka marrë të dhënat e para për viktimën, i cili ishte një person, që edhe pse nuk kishte precedentë penalë, hetohej për trafiqe të jashtëligjshme.
Lexo edhe:
