Prokuroria e Tiranës ka mbyllur hetimet dhe ka çuar për hetim dosjen e vrasjes në zonën e ish-Bllokut në lokalin Monopol.
Në tetor të vitit 2018 pas një konflikti me armë zjarri në lokalin Monopol ka mbetur i vrarë Fabiol Gaxha dhe i plagosur rëndë Elion Hato dhe biznesmeni Ervis Martinaj.
Sipas dosjes së prokurorisë, për vrasjen akuzohet komandoja i Forcave Ushtarake Marviol Bilo, kushëriri i këngëtares Elvana Gjata, njëherësh dhe truproja i të fejuarit të saj, Ervin Mata. Ndaj tij është ngritur gjithashtu akuza e vrasjes së mbetur në tentativë ndaj biznesmenit Ervis Martinajt dhe mikut të tij Elion Hato dhe ajo e “Mbajtjes pa lejë të armëve luftarake”.
I pandehur në këtë proces është marrë edhe Ervis Martinaj, i cili fillimisht në këtë dosje është hetuar dhe mbajtur për 7 muaj në burg me akuzën e “Vrasjes me paramendim” mbetur në tentativë, por prokuroria e Tiranës, në konkluzionin përfundimtar të dërgimit të dosjes në gjykatë, ka ngritur ndaj Martinaj akuzën e “Sigurimit të kushteve dhe mjeteve për vrasje” pasi Martinaj i ka dërguar sms miqve të tij për t’u afruar në zonën e ish-bllokut. Akuza e vrasjes ndaj tij ka rënë por në një dalje publike zëdhënësja e Operacionit “Forca e Ligjit”, deklaroi se Ervis Martinaj është person në hetim për akuzën e “Vrasjes me paramendim”.
Ndaj tij janë ngritur edhe akuzat “Fshehje të ardhurash”, “Falsifikimit të pasaportave dhe kartave të identitetit”, pasi Martinaj pas ngjarjes ju sekuestrua një pasaportë Kosovare me emrin Admir Koca dhe “Organizim ose ushtrim i veprimtarisë së lojërave të fatit” në kundërshtim me ligjin.
I pandehur është marrë dhe Ervin Mata pasi prokuroria ka ngritur akuzën e Moskallëzimit të krimit dhe Përkrahje të autorit të krimit”, pasi dyshohet se është personi që ka ndihmuar komandon Marviol Bilon të largohet me shpejtësi nga vendi i ngjarjes, duke mos u arrestuar sot e kësaj ditë nga policia kriminale e Tiranës./Opinion.al
