Dy ngjarjet e ndodhura mbrëmjen e djeshme në kryeqytet, ku një efektiv i policisë qëlloi për vdekje një koleg, ndërsa një tjetër efektiv la të plagosur një qytetarë në Kombinat, janë kthyer në debat edhe në Komisionin e Ligjeve.
Deputeti i Partisë Demokratike, Dashnor Sula gjatë mbledhjes së Komisionit të Ligjeve u shpreh se 30-40% e efektivëve të policisë rezultojnë të jenë përdorues të lëndëve narkotike.
Ai tha se ata efektivë që janë rekrutuar jashtë kritereve të largohen menjëherë.
“Ne si Komision Ligjesh duhet të reagojmë për ngjarjet e rënda që kanë ndodhur brenda policisë së shtetit. 30-40% e policëve të rinj rezultojnë përdorues të lëndëve narkotike. Është imediate që policia e shtetit, elementët që janë rekrutuar jashtë kritereve të largohen. Janë ngjarje të përsëritura këto në polici”,-tha deputeti i PD.
Ndërsa kryetarja e Komisionit të Ligjeve, Klotilda Bushka inkurajoi drejtorinë e policisë që të përjashtojnë elementët që prishin rendin.
“Mbështetje për drejtorin e policisë që të përjashtojë element që e prishin rendin. Ne si Kuvend kaluam ligjin për mbikëqyrjen e policisë. Veç kritereve të forta për tu bërë pjesë e policisë, ato kritere duhen ndjekur edhe pasi rekrutohen”,-u shpreh Bushka.
