Detaje të reja kanë dalë nga vrasja e 35-vjeçarit Can Kariçi mbrëmjen e djeshme në Kodër-Kamëz.
Raportohet se të paktën dy persona dyshohet se kanë marrë pjesë në atentatin ku u ekzekutua i riu. Mësohet se një nga dy atentatorët ka kryer rolin e qitësit, ndërsa tjetri ka qenë drejtues i automjetit. Autorët ende nuk janë identifikuar.
Sikurse u bë me dije, vetëm pak orë pas vrasjes një makinë tip “Audi” u gjet e djegur në Institut, e cila dyshohet se është e autorëve. Makina është me targa të huaja, ndërsa brenda saj është gjetur edhe një automatik.
Kariçi dyshohet se është ruajtur nga atentatorët dhe më pas është ekzekutuar sapo ka ndezur makinën në rrugën “Nikoll Vatnikaj”. Ai është qëlluar brenda makinës së tij të cilën e përdorte për të lëvizur.
Ngjarja e rëndë ndodhi mbrëmjen e djeshme rreth orës 20:00. Dyshohet se vrasja është kryer me pistoletë me silenciator pasi nuk janë dëgjuar të shtëna arme. Menjëherë pas krimit, autorët janë larguar me mjetin tip ‘Audi’ që u gjet i djegur.
Viktima kishte precedentë të mëparshëm penal në fushën e krimeve kundër personit. Pas kontrolleve në mjetin e tij policia gjeti një pistoletë./Opinion.al
