Gjykata e Apelit ka lënë në fuqi masën e “detyrimit të paraqitjes” për Ervin Matën, i përfshirë në vrasjen e 4 tetorit në zonën e ish-Bllokut. Gjykata e dha këtë masë sigurie më 4 mars, por Prokuroria e apeloi vendimin duke kërkuar “arrest me burg”.
Aktualisht, nga personat e përfshirë në vrasjen e Bllokut, në burg po qëndron vetëm Ervis Matinaj, ndërsa ish-komandoja Mariol Billo është ende në kërkim.
Pas pesë muajsh arrati, Ervin Mata u dorëzua vetë në Policinë e Tiranës mbrëmjen e 1 marsit. Ervin Mata ishte njëri prej personave të shpallur në kërkim pas ngjarjes së ndodhur në 4 Tetor të vitit të kaluar në zonën e ish-Bllokut, ku mbeti i vrarë Fabian Gaxha dhe u plagosën Eljo Hato dhe Ervis Martinaj./Opinion.al
