Një 37 – vjeçar u ekzekutua me thikë mbrëmjen e së shtunës në një nga rrugët kryesore të Elbasanit. Viktima është Erion Mihallari.
Ngjarja ndodhi në afërsi të Stacionit të Trenit, në rrugën e cila është aktualisht në rikonstruksion.
Persona ende të paidentifikuar e kanë pritur viktimën pranë shtëpisë dhe sapo ai ka mbërritur, ata kanë zbritur nga një makinë dhe kanë qëlluar disa herë me thikë 37 – vjeçarin, duke e lënë të plagosur rëndë në mes të rrugës. Megjithëse i është dhënë ndihma e parë, ai ka ndërruar jetë duke u transportuar për në spital.
Në vendin e ngjarjes kanë shkuar menjëherë forca të shumta policie, të cilat kanë rrethuar zonën përreth. Njëkohësisht janë ngritur edhe disa postblloqe për të ndalur autorët, të cilët kanë përfituar nga errësira për të humbur gjurmët.
Ende nuk dihen motivet e kësaj vrasjeje. Grupi hetimor po punon për të zbardhur rrethanat e krimit. Po verifikohen kamerat e bizneseve në zonë ndërsa po merren në pyetje dëshmitarë të ngjarjes. Janë duke u pyetur edhe familjarët e viktimës, për konflikte të mundshme të tij./Tv Klan
