Elton Çiço, 35 vjeçari që u ekzekutua të dielën në zonën e bllokut në Tiranë, jepte para me fajde. Ndërsa i vëllai jeton jashtë vendit dhe dyshohet se dërgonte para të bëra nga trafiku i drogës.
Grabitja
Në Mars 2015 disa persona hynë në shtëpinë e Naim dhe Andoneta Çiços (prindërit e Eltonit), në Tepelenë, pasi kishin të dhëna se mund të ketë shumë para.
Djali i vogël i familjes, Eltoni, ishte një person i njohur për dhënie parash me fajde.
Burimi i këtyre parave nuk është arritur të zbulohej, por dyshimet kryesore për krijimin e pasurisë mendohet se është vëllai i tij, i cili jeton prej vitesh në Angli.
Gjithashtu, Eltoni ka qenë i skeduar nga ana e policisë, si një person që mund të merrej me trafikun e lëndëve narkotike. Megjithatë, këto dyshime nuk u arritën të provoheshin asnjëherë nga ana e Policisë.
Në fillim të marsit 2015, pak kohë para vjedhjes së dhunshme në familjen Çiço, një drejtues punishteje duralumini nga Tepelena, por me banim në Tiranë, Ervis Imeri, kryen disa punime në banesën e të moshuarve. Duke qenë se volumi i punës ishte i madh, ai ka marrë si punëtor një person nga Laçi, Robert Rama.
Të paktën, kështu ua prezantoi pronarit të shtëpisë, Naim Çiço. Por në fakt, siç rezultoi nga hetimet për vjedhjen, tepelenasi Imeri dhe laçiani Rama po përgatisnin vjedhjen e banesës, pasi mendonin se aty kishte shumë para, nga ato që djali i familjes u jepte me fajde personave të interesuar.
Mbrëmjen e 31 Marsit 2015, Ervis Imeri gjendej në makinën e tij, pak metra larg shtëpisë së familjes Çiço, ndërkohë që Robert Rama dhe disa persona ende të paidentifikuar, bastisën me dhunë ambjentet e banesës. Pasi nuk gjetën atë që kërkonin, vjedhësit dhunuan rëndë fizikisht bashkëshortër Naim dhe Andoneta, të cilët përfunduan në spital.
Hasmëria
Në 11 qershor 2015, në zonën e ish-Kënetës në Durrës, policia merr njoftimin që dy persona me motor kanë vrarë një djalë të ri. Nga verifikimet, rezultoi se viktima ishte laçiani Robert Rama. Ai ishte shpallur në kërkim nga policia për ngjarjen e ndodhur në Tepelenë, por deri në atë kohë nuk ishte bërë i mundur arrestimi i tij.
Një nga pistat e para të ngritura ishte hasmëria me familjen Çiço. Por provat nuk ishin të plota për të lidhur drejtëpërdrejtë autorët e vrasjes me Elton Çiçon.
Nga ana tjetër, viktima Rama ishte i dyshuar edhe për trafik lëndësh narkotike dhe vrasja e tij mund të lidhej edhe me ndonjë prishje pazaresh.
Pas një muaji, në Korrik 2015, në makinën e Ervis Imerit, përballë punishtes së tij në zonën e Kombinatit në Tiranë gjendet një sasi tritoli e pashpërthyer. Paralel me hetimet për vendosjen e lëndës eksplozive, policia mori në dorë urdhërin e ndalimit të Prokurorisë së Gjirokastrës, e cila dyshonte se Ervis Imeri ishte një prej autorëve të vjedhjes së dhunshme në Tepelenë. Ndërkohë, ende nuk është zbardhur autori i vendosjes së tritolit të pashpërthyer në makinën e Imerit, por dyshimet më të forta qëndrojnë mbi Elton Çiçon.
Policia vijonte hetimet për vrasjen dhe atentatin e dështuar ende, ngjarje ende pa autor, ndërkohë që në Dhjetor 2015, një tjetër shpërthim tritoli ndodh në mjetin e vëllait të të arrestuarit Ervis Imerit, shtetasit Elton Imeri.
Ky i fundit, një ushtarak pa probleme me ligjin, humbet njërën këmbë gjatë shpërthimin të makinës së tij në ecje, sërish në zonën e Kombinatit, në Tiranë.
Katër muaj më pas, mbrëmjen e 1 Majit 2016, Elvis Çiçon e vrasin në ambjentet e lokal “De Niro” në zonën e ish-bllokut, në Tiranë.
