Autori i vrasjes së Elton Çiçës mbrëmë në një lokal në Tiranë, dyshohet se është një ish polic. Sipas burimeve Çiça ka qenë i armatosur, por nuk ka mundur ta përdorë pistoletën. ABC News ka siguruar pamjet e momentit të ekzekutimit.
Ky është momenti kur Elton Çiça, 35 vjeç qëllohet me armë nga një person i paidentifikuar mbrëmjen e së dielës.
Siç duket edhe nga pamjet që ABC News ka siguruar, Elton Çiça ka qenë i ulur në një lokal edhe me 3 persona të tjerë.
Ata ishin duke biseduar, ndërsa në lokal ka hyrë një person me një kapele sportive dhe me një pistoletë në dorë.
Ai ka hyrë me nxitim dhe sapo është afruar tavolinës ku ka qenë ulur Çiça me 3 persona tjerë, ka qëlluar 2 herë ne drejtim të Çiçës.
Në momentin kur është qëlluar, të katërt personat janë çuar nga tavolina përfshirë edhe Elton Çiçën. Por për shkak të plageve të marra, Elton Çiça rrëzohet mbi tavolinë.
Elton Çiça dërgohet në spital nga personat që ishin prezentë. 35 vjeçari Çiça nuk ka mundur t’u mbijetojë plagëve të marra dhe ndërron jetë në spital.
Elton Çiça dyshohet se ka qenë i armatosur, por nuk mundur ta përdorë pistoletën, pasi autori ka qëlluar menjëherë.
Pasi ekzekutoi me armë 35 vjeçarin Çiça, vrasësi është larguar me vrap nga lokali. Ai ka kaluar në disa rrugica të zonës së ish-Bllokut, dhe më pas dyshohet se është larguar me makinë.
Burime nga grupi i hetimit thanë se Elton Çiça ishte përfshirë në një konflikt me personat që i grabitën shtëpinë në marsin e vitit të kaluar, në Tepelenë. Grabitësit i kishin rrahur prindërit dhe më pas ishin arrestuar. në atë kohë u shpallën të dyshuar për ngjarjen Robert Rama, i vrarë në qershorin e vitit të kaluar dhe Ervis Imeri.
Ky i fundit eshte shoqeruar nga policia per tu marr ne pyetje ne lidhje me ngjarjen. Ervis Imeri i shpëtoi një atentati me tritol, por vëllai i tij u plagos rëndë nga një atentat tjetër me tritol. Policia dyshon se viktima Elton Çiça u ekzekutua për shkak të hakmarrjes.
