Gjykata e Tiranës shpalli të pafajshëm Kristjan Marinajn, i akuzuar se në bashkëpunim me ish-deputetin Mark Frroku kanë vrarë shtetasin Aleksandër Kurti në vitin 1999 në Belgjikë.
Togat e zeza, teksa lexuan vendimin në sallën e gjyqit thanë se prokuroria nuk solli prova të mjaftueshme që vertetonin se Marinaj është autori i vrasjes së Aleksandër Kurtit në Belgjikë 18 vite më parë.
Nga ana tjetër, prokuroria gjate leximit te pretences kishte kerkuar 16 vite burg per Kristian Marinajn me pretendimin se në bashkëpunim me Mark Frrokun dhe dy persona të paidentifikuar kanë qëlluar me thikë Aleksandër Kurtin. Në mbështetje të këtyre fakteve, prokuroria ka pretenduar se hetuesit belg kanë mbledhur prova të mjaftueshme që provojnë përfshirjen e Marinajt në vrasje.
Por, gjykata shqiptare këto prova i cilësoi si të pamjaftueshme për të provuar fajësinë e personit të shpallur në kërkim Kristjan Marinaj.
Kështu Gjykata e Tiranës e cilësoi të pafajshëm të pandehurin, që gjykata belge e kishte dënuar me 10 vite burg vite më parë, por vendimi është shfuqizuar dhe dosja është kthyer për rigjykim për arsye proceduriale. Më pas, po kjo dosje është transferuar në Shqipëri me kërkesë të prokurorisë shqiptare, për të vazhduar gjykimin këtu.
Ndërkohë gjatë ditës së enjte, pritet që prokuroria të lexojë konkluzionet përfundimtare ndaj ish-deputetit Frroku për të njejtën akuzë penale.
Sipas akuzës, vrasja e Aleksandër Kurtit ka ndodhur në mars të 1999 në Blegjikë, për shkak të dyshimeve të përfshirjes së të pandehurve dhe viktimës në trafikun e femrave me qëllim ushtrimin e prostitucionit.
