Policia ka vënë në pranga Nikoll Sherrnikun dhe ka shpallur në kërkim Brilant Martinaj, si autorë të dyshuar për vrasjen e efektivit të policisë Xhulio Prela.
Në studion e emisionit “Opinion” gazetarët Artan Hoxha, Klodiana Lala dhe Etleva Delia, thanë se sipas burimeve ka pretendime që në ngjarje ka qenë edhe një person i tretë.
“Ajo që më shqetëson është që disa variante dalin për ngjarjen. Dhe kjo pjesa e fundit, që ka dalë një person aty i panjohur, kjo më duket pak… kërcet. Kjo duket rrethanë lehtësuese për dikë nga ata që janë identifikuar”, tha gazetari Hoxha.
Ndërkohë gazetarja Etleva Delia vuri në dukje të tjerë elementë jo të qartë lidhur me ngarjen.
“Edhe para se të dilte ky i treti ishte një variant që thuhej, se kamerat e sigurisë kanë filmuar një farë momenti dhe nuk kuptohet se cilët nga personat ka qëlluar”.
Gazetarja Klodiana Lala e konsideroi këtë ngjarje, një situatë për luftë të ftohtë mes policisë dhe prokurorisë.
“Policia përpiqej të konsideronte Nikoll Sherrnikun si ekzekutor. Policia dhe prokuroria janë në luftë të ftohtë për këtë ngjarje. Prokuroria pretendon që të dy personat e arrestuar janë bashkëpunëtorë, ndërsa flitet për një person të tretë që ka qenë autori që ka qëlluar”, u shpreh Lala/Opinion.al
